उद्योग, वाणिज्य तथा आपूर्तिमन्त्री रमेश रिजालले सिमरा विशेष आर्थिक क्षेत्र (सेज) मा उपलब्ध रोजगारीमा स्थानीयलाई प्राथमिकता दिनुपर्नेमा जोड दिएका छन् ।
शनिबार सिमरामा जनप्रतिनिधि, उद्योगी, व्यापारी, नागरिक समाजका अगुवा र स्थानीयसँग सिमरा सेज सम्बन्धी विषयमा भएको छलफलमा उनले सिमरा सेजमा रोजगारीका अवसरमा बारा र पर्सा जिल्लाका बासिन्दालाई पहिलो प्राथमिकता दिनुपर्नेमा जोड दिए ।
उद्योग मन्त्रीले सेज भित्र कुनै पनि आन्दोलन र औद्योगिक कारबाही नगर्न सुझाव दिए । उनले सेजबाट उद्योग सञ्चालन गर्न रोज्ने व्यवसायीलाई सुविधा उपलब्ध गराइने बताए ।
बारा क्षेत्र नं ४ का सांसद किसन श्रेष्ठले उद्योगीलाई सेजभित्रको जग्गा सित्तैमा उपलब्ध गराउन सुझाव दिए । “आर्थिक मन्दीका कारण उद्योगीहरू आफूले लिजमा लिएको सेजभित्रको जग्गा फिर्ता गर्ने मुडमा रहेको अवस्था सिर्जना भएको छ, त्यसैले उद्योगले ६० प्रतिशत निर्यात गर्नुपर्ने व्यवस्था गर्दै जग्गाको भाडा नि:शुल्क गरिनुपर्छ । उत्पादनलाई ३० प्रतिशतमा झार्नुपर्छ,’ उनले भने ।
जीतपुर सिमरा उपमहानगरपालिकाका मेयर राजन पौडेलले पूर्व–पश्चिम राजमार्ग र वीरगन्ज सुख्खा बन्दरगाह सडकलाई जोड्ने ६ लेनको सडकलाई सेजमा सहज पहुँचका लागि कम्तीमा ४० मिटर चौडाइमा जोड्नुपर्ने बताउनुभयो ।
छलफलमा उद्योग, वाणिज्य तथा आपूर्ति मन्त्रालयका सचिव रमेशप्रसाद निरौला, सेजका कार्यकारी निर्देशक चण्डिका भट्ट, मेयर पौडेल, स्थानीय वडाध्यक्ष, विभिन्न राजनीतिक दलका प्रतिनिधि र स्थानीयको सहभागिता थियो ।
सो अवसरमा स्थानीयले विशेष आर्थिक क्षेत्रभित्रको रोजगारीमा प्राथमिकता दिनुपर्ने माग राखेका थिए भने नागरिक समाजका प्रतिनिधिले सेजभित्रका उद्योग सञ्चालनमा सहजीकरण गर्न सरकारसँग माग गरेका थिए ।
१६१ पटक हेरीएको
