रोल्पा — परिवर्तन गाउँपालिका–४ पाछाबाङमा जलजला युवा क्लबले आयोजना गरेको १९औँ वार्षिकोत्सव तथा परम्परागत राक्सेबाङ मेलाको उद्घाटन कार्यक्रम स्थानीय तीन प्रमुख राजनीतिक दलले बहिष्कार गरेका छन्।
मंसिर ८ देखि ११ गतेसम्म सञ्चालन हुने मेलाको उद्घाटनका लागि दिउँसो १२:०० बजे अतिथिहरूलाई उपस्थित हुन निम्तो गरिएको थियो। तर दिउँसो ३:०० बजेसम्म पनि कार्यक्रम सुरु नहुँदा नेपाली कांग्रेस, नेकपा (एमाले) र नेपाल कम्युनिष्ट पार्टी (माओवादी) का प्रतिनिधिहरूले सामूहिक रूपमा उद्घाटन बहिष्कार गरेको जानकारी दिएका छन्।
दलहरूले गाउँपालिकाको समन्वयमा कार्यक्रम ढिलाइ र सुस्त गतिमा सञ्चालन भएको आरोप लगाएका छन्। यस्तै केही दिनअगाडि गाउँपालिकाले गठन गरेको खेलकुद समितिप्रति पनि उनीहरूले असन्तुष्टि जनाउँदै आएका थिए।
यस विषयमा नेपाल कम्युनिष्ट पार्टी (माओवादी केन्द्र) रोल्पाका जिल्ला सचिव पृथ्वी डाँगीले अघिल्लो वर्ष क्लबसँग विभिन्न विषयमा विवाद भएको उल्लेख गर्दै, “यस वर्ष पनि समयमा कार्यक्रम सञ्चालन नभएपछि हामीले बहिष्कार गर्ने निर्णय गर्नुपर्यो,” भने।
यता आयोजक जलजला युवा क्लबले भने मेलाका अन्य कार्यक्रमहरू निर्धारित समयअनुसार सञ्चालन गरिने जनाएको छ।
१२७ पटक हेरीएको
