२३ मंसिर, काठमाडौं । प्रधानमन्त्री पुष्पकमल दाहाल ‘प्रचण्ड’ले देशको अर्थतन्त्रको पुनरुत्थानका लागि आफू गम्भीर रहेको बताउनुभएको छ ।
कैलाली उद्योग वाणिज्य संघले धनगढीमा आयोजना गरेको सुदूरपश्चिम महोत्सवको शुक्रबार उद्घाटन गर्दै प्रधानमन्त्रीले अबको केही महिनाभित्रै मुलुकको अर्थतन्त्रलाई पुनरुत्थान गर्न पाए यो आफ्नो लागि गौरवको क्षण हुने बताउनुभयो । सो अवसरमा प्रधानमन्त्रीले आफ्नो प्रधानमन्त्रीको सुरुवाती दिनमा अर्थतन्त्रको निराशाजनक अवस्थाका बीच अहिले अर्थतन्त्रमा केही सुधारका संकेत देखिएको बताए । ‘रेमिट्यान्स आप्रवाह बढेको छ, धेरै पर्यटक नेपाल आएका छन्, गत महिनादेखि राजस्व संकलन बढेको छ, विदेशी मुद्रा सञ्चिति पनि बढेको छ,’ प्रधानमन्त्रीले भने ।
सम्बोधनमा प्रधानमन्त्री प्रचण्डले सामाजिक न्याय, सुशासन र समृद्धिका लागि पहल थालिएको बताए । कार्यक्रममा प्रधानमन्त्री ओलीले प्रधानमन्त्री पदमा नरहुन्जेल राष्ट्र र जनताको हित विरुद्धको काम हुन नदिने बताउनुभयो । उनले एनसेलको शेयर बेचबिखनबारे छानबिन गर्न सरकारले समिति बनाएको पनि बताए ।त्यसैगरी प्रधानमन्त्री प्रचण्डले सिङ्गो सुदूरपश्चिम प्रदेशको विकासका लागि आफू प्रतिबद्ध रहेको बताउँदै उद्योग, शिक्षा र स्वास्थ्य क्षेत्रलाई बढी प्राथमिकतामा राखेको बताए ।
प्रधानमन्त्रीले गेटा मेडिकल कलेजलाई शहीद दशरथ चन्द स्वास्थ्य विज्ञान विश्वविद्यालय बनाउने विधेयक छलफलमा रहेकाले अन्योलमा नपर्न त्यहाँका जनतालाई आग्रह गरे । उनले फाप्ला क्रिकेट रंगशालालाई राष्ट्रिय गौरवको आयोजनाका रुपमा अगाडि बढाउने प्रतिबद्धता व्यक्त गर्दै उराई भञ्ज्याङ नाका, दोधारा चाँदनी सुख्खा बन्दरगाह र पञ्चेश्वर जलविद्युत् आयोजनाको काम भइरहेको जानकारी दिए । खप्तड क्षेत्र, परशुराम धामलगायत प्रदेशका अन्य क्षेत्रको विकास गर्ने पनि प्रधानमन्त्रीले आश्वासन दिए । कार्यक्रममा सुदूरपश्चिम प्रदेश प्रमुख देवराज जोशीले स्थानीय समुदाय, सरोकारवाला र प्रदेश सरकारले उठाएका समस्या समाधान गर्न सङ्घीय सरकारले ध्यान दिनुपर्ने बताए । यसैबीच, प्रधानमन्त्री एवं नेकपा (माओवादी केन्द्र)का अध्यक्ष प्रचण्डले कैलालीको धनगढी उपमहानगरपालिकाको घसीटा क्षेत्रमा पार्टीको विशेष रुपान्तरण अभियानलाई सम्बोधन गर्दै आफ्नो सरकारले जनआकांक्षाअनुरूप काम गरिरहेको बताए ।
पूर्वाधार विकास, आर्थिक विकास, सुशासन र सामाजिक न्यायमा सरकारको ध्यान केन्द्रित छ । प्रधानमन्त्रीले नेपालको विकासका लागि छिमेकी मुलुक भारत र चीन र अमेरिकासँगको सहकार्यलाई प्रगाढ बनाउन र नेपालको गौरव उचाल्न पनि आफूले काम गरिरहेको बताए । प्रचण्डले पार्टीले जारी अभियान पूरा गरी विधान सम्मेलन गर्ने र त्यसपछि महाधिवेशन गर्ने बताए ।
माओवादी पार्टीको जारी अभियानले जनता र माओवादी कार्यकर्ताबीचको सम्बन्धलाई पुनः स्थापित गरेको छ र पार्टी कार्यकर्ता, जनयुद्धका घाइते योद्धा, शहीद परिवार र जबर्जस्ती बेपत्ता पारिएका परिवारबीचको सम्बन्धलाई नवीकरण गरेको उनले बताए ।
१४३ पटक हेरीएको
