सल्यानको कपुरकोट–कोइला सडक खण्डमा चल्ने चुनढुङ्गा बोकेका अत्यधिक भारवाहक टिप्पर सञ्चालनमा रोक लगाउँदै स्थानीयवासी र विद्यार्थी सडकमा उत्रिएका छन् । वर्षौँदेखि धुलो, खाल्डाखुल्डी र सडकको जीर्ण अवस्थाले सास्ती खेप्दै आएका स्थानीयहरूले सडक पूर्ण रूपमा कालोपत्रे गर्नुपर्ने माग राख्दै आन्दोलन थालेका हुन् ।
बुधबार कपुरकोट गाउँपालिका वडा नम्बर ५ स्थित मिलन बजार व्यवस्थापन समिति र मिलनबजार युवा क्लबको नेतृत्वमा भएको १२७ जना स्थानीय तथा सरोकारवालाको भेलाले टिप्पर सञ्चालन बन्द गर्ने निर्णय गरेको थियो । सो निर्णयको जानकारी जिल्ला प्रशासन कार्यालय सल्यान, जिल्ला प्रहरी कार्यालय र कपुरकोट गाउँपालिकालाई दिइसकिएको मिलन बजार व्यवस्थापन समितिका अध्यक्ष अमर बहादुर विकले बताएका छन्।
उनका अनुसार अत्यधिक धुलो, भारी टिप्परको आवतजावत, सडकको भत्किएको अवस्था र त्यसले स्थानीय जीवन, स्वास्थ्य तथा विद्यालय जाने बालबालिकाको सुरक्षामा गम्भीर असर पारेपछि अन्तिम विकल्पका रूपमा आन्दोलन गर्नुपरेको हो । उद्योगले पानी छर्केर धुलो कम गर्ने प्रयास गरे पनि त्यसलाई औपचारिकता मात्र भन्दै सडक कालोपत्रे नभएसम्म टिप्पर चल्न नदिने स्थानीयको अडान छ ।
स्थानीयहरूले २०७९ मा कपुरकोट गाउँपालिका, उद्योगी र टिप्पर व्यवसायीबीच भएको सात बुँदे सहमति—सडक मर्मत, धुलो नियन्त्रण, कालोपत्रे पहल, विद्यालय समयमै टिप्पर रोक, सामाजिक उत्तरदायित्व कोष, रोजगारी प्राथमिकता र संयुक्त अनुगमन—कार्यान्वयन नभएको आरोप लगाएका छन् ।
यता कपुरकोट क्षेत्रमा टिप्पर बन्द भएपछि त्रिवेणी गाउँपालिका वडा नं ४ निगालपानी हुँदै त्रिवेणी गाउँपालिका वडा नं २ द्धारपानी, घोगें, दहबन तथा रुन्टिगढी गाउँपालिका केन्द्र होलेरी हुँदै दाङतर्फ वैकल्पिक मार्ग प्रयोग भइरहेको छ । उक्त कच्ची सडकमा दैनिक धेरै संख्यामा टिप्पर गुड्दा अत्यधिक धुलो उड्न थालेको र शिव माध्यमिक विद्यालय द्धारपानीको पठनपाठनमा समेत असर परेको भन्दै स्थानीयले गुनासो गरेका छन् ।
२४२ पटक हेरीएको
