९ माघ, काठमाडौं । प्रधानमन्त्री पुष्पकमल दाहाल ‘प्रचण्ड’ले लामो समयदेखि पालो पर्खिरहेका सेवाग्राहीलाई तत्काल सवारी चालक अनुमतिपत्र उपलब्ध गराउन निर्देशन दिएका छन् ।
ड्राइभिङ लाइसेन्स कार्ड, राष्ट्रिय परिचयपत्र र राहदानी वितरणसम्बन्धी काम गर्ने अधिकारीहरूसँगको संयुक्त बैठकमा प्रधानमन्त्रीले सवारी चालक अनुमतिपत्रका लागि आवेदन दिने १४ लाख आवेदकलाई तत्कालै सवारी चालक अनुमतिपत्र वितरण गर्न निर्देशन दिएका हुन् । ड्राइभिङ लाइसेन्सको परीक्षा उत्तीर्ण गरेर पनि सवारी चालक अनुमतिपत्र पाउन नसक्नु गम्भीर विषय भएको बताउँदै प्रधानमन्त्रीले सवारी चालक अनुमतिपत्र वितरणमा ढुक्क हुन यातायात व्यवस्था विभागलाई सचेत गराए । ‘अहिलेको समयमा सूचना प्रविधि महत्वपूर्ण छ, एकीकृत प्रविधिमा आधारित नतिजा दिनुपर्छ, यसका लागि राज्यका संयन्त्रबीच समन्वय आवश्यक छ’, प्रधानमन्त्री प्रचण्डले भने । सो अवसरमा प्रधानमन्त्रीले सरकारी कार्यालयमा लामो लाइनको अन्त्य गर्ने आफ्नो प्रतिबद्धताको स्मरण गराए । प्रधानमन्त्रीले कार्यालयको दक्षता अभिवृद्धि गर्दै गुणस्तरीय सेवा प्रवाहमा गम्भीर ध्यान दिन पनि पदाधिकारीहरुलाई आग्रह गर्नुभयो । त्यसैगरी, प्रधानमन्त्रीले हाम्रो आफ्नै स्रोत कोड विकास गर्ने बारे गम्भीरतापूर्वक सोच्न अधिकारीहरूलाई आग्रह गरे। ‘सानासाना प्राविधिक समस्या समाधान गर्न पनि विदेशीलाई आमन्त्रित गर्ने सन्दर्भ हामीसँग छ। हामी रातारात सबै कुरा परिवर्तन गर्न सक्दैनौं तर योजनाबद्ध ढंगले काम गर्दै बिस्तारै परिवर्तन गर्न सक्छौं,’ प्रधानमन्त्रीले अधिकारीहरूलाई आफैंले दक्ष जनशक्ति उत्पादन गर्न आग्रह गरे।
बैठकमा उपप्रधानमन्त्रीहरु पूर्णबहादुर खड्का र नारायणकाजी श्रेष्ठ, परराष्ट्रमन्त्री एनपी साउद, भौतिक पूर्वाधार तथा यातायातमन्त्री प्रकाश ज्वाला, मुख्य सचिव डा वैकुण्ठ अर्याल, गृहसचिव दिनेश भट्टराई, भौतिक पूर्वाधार सचिव केशवकुमार शर्मालगायत सरोकारवाला निकायका प्रमुखहरु सहभागी थिए । विभागको उपस्थिति रहेको थियो ।
१६७ पटक हेरीएको
